سطرت من دمعي حروف القصايد

**عاشق الصمت** الأربعاء 24 أغسطس 2011, 4:16 am

سطرت من دمعي حروف القصايد

وغنيت في راس الطويلة طواريق

اكتب وهمي داخل القلب شايد

بالوصف كنه ضلع ابانات و طويق

احاول اسلا عن همومي و احايد

من دون ترويج المشاعر وتسويق

والحب جايز في جميع العقايد

رغم انف من نمق له القول تنميق

وما يلحق العاشق بحبه نقايد

والهاجس اللي كل ماقلت له ليق

يمشي بدرب العشق حسب العوايد

متجنب اللي بالمحبين ما يليق

و قل للذي صدّق كلام الجرايد

ما يقِْنع العاقل كلام المطافيق

كلام ماله بالمدارس شهايد

مثل السراب ان طارده ناشف الريق

وكتبت في ظل الظروف الشدايد

حقايق ن ما هي دعاية وتلفيق

دام امتلك قدرة بصيد الشرايد

قدمتها لـ اهل الوجيه المطاليق

نظمتها ياقوت مثل القلايد

والا الزهور اليانعات المفاتيق

اهداءِ باقة ورد لِن جيت اعايد

والورد ما يهدى لكل المخاليق

في حب من سافر ولاهوب عايد

وش لون! مدري! ليه ؟خان المواثيق ؟!

صد وغيابه شب فيني وقايد

قلت :آآه ياليته ولو مره يويق

ليا طرى والحزن قام يتزايد

كني وقعت من عاليات الشواهيق

قلته وجرحي وسط الاعماق كايد

وسوالف العشاق اثارة وتشويق

ان فاق صوت القلب صوت الرعايد

فالموقف اعظم من قصيدة و تعليق

وحمام يسجع فوق خضر الجرايد

صوته يمزِّق خافق العشق تمزيق

عشقي عنود الصيد لا جيت صايد

فيها حلا ما خالطته المساحيق

من بعد ما حبه على القلب سايد

مات الأمل والوضع يا ناس تفريق

و اللي من اسبابه غدينا بعايد

حسبي عليه الله رب المخاليق

باسباب فعله عفت نوم الوسايد

عفت الحياه اللي بها هم مع ضيق

و اصبر وانا ادري الصبر مابه فوايد

لعيونها صرت احتمل فوق ما طيق

كـلـمـااات
(طوفان الإبداع)
منصور بن تركي الدبيسي

الإثنين	الثلاثاء	الأربعاء	الخميس	الجمعة	السبت	الأحد
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30